गुजरात मध्यें गेल्यावर महत्वाची सर्व सुप्रसिद्ध ठिकाणं सगळे पाहतातच. मात्र त्या पलीकडे अनेक सुंदर ठिकाणं आहेत ती पाहणं मनोरम आहे. मही या मोठ्या नदीसोबत गलती या छोट्या नदीचा जिथं संगम होतो त्या संगमावर निर्मिलेलं गळतेश्वर मंदिर हे असंच देखणं मंदिर. वडोदरापासून सुमारे 80 किमीवर असलेलं हे मंदिर किमान 1100 वर्षं जुने आहे.
शक्यतो या भागातील मंदिरे ही गुजराती चालुक्य किंवा परमार पद्धतीने बांधलेली असली तरी हे मंदिर मात्र मालवाच्या भूमिज शैलीत आहे असं मानतात. तांबूस पिवळ्या दगडात अष्टभुजांवर केलेली मंदिराची उभारणी अत्यंत देखणी आहे. मंदिराचे गर्भगृह आतून चौकोनी तर समोरचा नृत्य मंडप सुबक अष्टकोनी आहे.
मंदिराच्या भिंतीवर केलेले नाजूक कोरीव काम, गंधर्वाच्या देखण्या मूर्ती, शिवशंकराच्या आयुष्यातील काही प्रसंग, अश्वारूढ सुंदरी, नर्तिका, चामुंडा आदि अनेक कोरीव शिल्पांची अतिशय नासधूस करण्यात आली आहे.
लहान लहान हत्तीची शिल्पे तर इतकी देखणी आहेत कीं बघत राहावेसे वाटते. त्याचीही पूर्वी मोडतोड करण्यात आली आहे. तरीही दिसणारे शिल्पकाम इतकं सुंदर आहे कीं याची तोडमोड करणाऱ्या त्या दुष्ट मनोवृत्तीच्या आक्रमकांविषयी अतिशय संताप वाटत राहतो.
या मंदिराचे छत पूर्वी पूर्ण कोसळले होते. आता ASI मार्फत त्याची नव्याने उभारणी करण्यात आली आहे.
मंदिराच्या शेजारूनहणारे मही नदीचे खळाळते विस्तीर्ण पात्र सर्वांनाच आकर्षित करणारे आहे. या निसर्गरम्य ठिकाणी आल्यावर अवघ्या चिंता, काळजी काही क्षण तरी मिटल्याचे नक्कीच अनुभवायला मिळते.
- सुधांशु नाईक (9833299791)🌿
कसे जाल : वडोदरा -सावली रोड - सावली गांव - डेसर - डावीकडे गळतेश्वर फाट्याने मंदिराकडे. ( एकूण अंतर सुमारे 80 किमी.)
No comments:
Post a Comment